Grønneviktankar

Juleferie 2011.

2011-12-20T23:47:00.002+01:00

Endeleg ferie! Vinterveret kjem og går, men regnet kan du alltid stola på. Eit julepynta hus gjer ein glad, og etter noko handel imorgon ser eg fram til det årlege julebadet i fjorden litle julaften. Ilag med gode (og tøffe) vener, blir det ein dukkert i Ålfjorden, og etterpå høver det med varm gløgg og peparkaker. Vervarslinga melder omlag same tempen i lufta som i vatn, men adrenalinet vil nok flaume likevel!

Sommar i regn.

2009-08-31T18:40:00.004+01:00

Dei fleste er nok samde med meg om at sommaren,- ja den var i slutten av juni.
Og så kom hausten! Med regn og blåst, og lite varme i sjøen for ivrige badarar!

Men besøket av vener fra andre land i Europa gjekk glimrande,- med fisking, bading, vikingbesøk og songstjernetevling. Gode måltid, interessante samtaler på engelsk, og bybesøk i Stavanger og Bergen. Kjekke folk vi kjenner!

Seinare vart det rikeleg førebuing til 50-årskalas på naustet, og arrangørane fekk eit levande innblikk i catering- og hotelldrift. Gleden var stor over at det ikkje vart karrierevegen vår! Men for ein glitrande fest: gjestene strålte og var blide, koste seg med sigarar frå Havana og flytande frå ulike land, inntok heimelaga matrettar som pirra og metta, og fekk oppleve mykje kulturelt: song skrive og framført av mine kjekke ungdommar, songar frå gode venner, presentasjon av jubilanten i mange fasettar, og dansemusikk frå førre århundre! Ei fantastisk og rørande oppleving!

Men veden ligg der! Rett nok er eindel av han kløyvd og ferdig, men mykje ligg att som ei kvise på samvitet. I regnet her vest skulle alle hatt sin eigen Rubbhall!

Valet er over oss med barometre og testar, og diskusjonar på radio og fjernsyn som folk flest ikkje bryr seg med. Dei store endringane vil nok glimre med sitt fråvere, uansett kven som sit med makta! Godt val!

Påskeferie!

2009-04-12T21:25:00.003+01:00

Lenge sidan sist! Familien ved fjorden har vore i skogen og arbeidd denne ferien, og i tillegg vore særs sosiale med slekt og vener! Husqvarna-en har gått seg varm og sterke hender har bore vekk greiner. Belønninga er meir sol og utsikt! Klatreveggen på Sveio har utfordra Odd Eirik, Håvard og meg- og barrierer er brotne! Når ikkje Roma eller London trekk oss til seg, er påsken ei flott tid å vere heime og kombinera sosialt liv med hage/skogstell!

Laurits!

2008-08-17T22:37:00.002+01:00

Denne gongen er det Laurits som skal minnast!

Me var heldige og fekk helst på han i Oslo, då me var med Håvard til Norway cup.
Budde fantastisk fint på Ekeberg, koste oss i varmen, handla, bada og heia på Sveio-gutane. På Ulvøya låg godguten under paraplyen og koste seg i sommarkvelden, etter ein aktiv dag med mykje triveleg tøys saman med dadda. Neste dag var strandpledd bytta med seng på Ullevål, og smilet var fråverande då doddo kom for å helse på. Laurits hadde vondt, og han kjempa med alt han hadde i vekene etterpå. Men trass tapre foreldre, god hjelp på Rikshospitalet, bøner og gode tankar frå slekt og vener, døydde vesleguten.

Takk for at me fekk bli kjent med deg! Når me seglar den vesle raude seglbåten, er du med oss i tankane!
Dadda, doddo, bestetante og besteonkel lyser fred over Laurits sitt minne!

Sommar.

2008-07-14T21:35:00.002+01:00

Det dei har rundt Middelhavet,- DET er sommar! Stå opp til duren av kaldluftapparatet, eta frukost frå bakaren tre minutt vekke på ein solfylt terrasse mens ein ser på dei kroatiske seglbåtane. Smøre seg inn med faktor før ein går ut i 34 grader. Helst ein vassfast som tåler 26 grader i reint havsalta vatn. Nyte å vere borte frå plikter og prosjekt. - Men ferien er ikkje over!

"Vinter" ... liksom?

2008-02-22T18:25:00.004+01:00

Tida går! Og vinteren er her,- på ein måte. Barndomens vintrar er ikkje til å kjenne att. Hugsar at me vart glade for snø, så noko sjelden var han nok, då og. Men så mykje regn huskar eg mest frå haustane, ...og somrane forresten!
Men i helga var veret fint på austlandet, slik at ungane fekk gå på skøyter! -i Spikersuppa! Og Laurits kjente oss betre for kvar dag som gjekk! Slike små har sin eigen livsrytme, og vi er heldige som får vera med i denne rytmen stundom! Men maisgraut er nok betre, trur vi!?
Flott bur dei og, tantungane! Sjølv om kvite veggar er uvante for oss med afrikafargar. Sentralt og triveleg, og kjekt å vise fram! Nett no er vi sjølv i oppussinga med maling, lakking og straks tapetsering. Det er minstejenta som er blitt lova "nytt" rom,- i varme franske gultonar. Det blir ho glad av!

Bloggar bør skrivas kvar dag, og ikkje kvar månad slik som denne! Men så er det og alle dei andre "bør-"ane: tran, trening, boklesing, turgåing, spansklesing, gå på besøk til ein venn, puss på båten, ete sunt.. Livet mitt har og sin eigen rytme, og eg heng ikkje alltid med i den rytmen. Heldig du Laurits! Som ikkje eig nokre "bør"! For slike blir fort ei bør å bera. Men bunaden er i rute!! Og eg blir glad av å ha ferie, drikka god Masi og skriva blogg! God vinter vidare!
-Bør nok skrive att fort!

Julakort!

2007-12-15T23:27:00.000+01:00

Her var løysinga! Istaden for enkle julakort med banal tekst, eller tettskrive årsrapportar: Her er julakortet mitt! Nokre sms-ar og facebook-meldingar unnateke, sjølvsagt! Kjekt å få nytta teknologien, i alle fall til dei som føl med på utviklinga. Berre tre arbeidsdagar til før ferien startar med det tradisjonelle julebadet i Ålfjorden. Ifjor var vi femten vinterbadarar som trossa skrekk og gru, og kasta oss i vatnet(som då var 8 grader). Det skal bli godt iår og: å kasta av seg stress og bekymringar i sjøen, for så å bygga seg opp att på gløgg og peparkaker oppe i huset. Vi drar til Skjold julaften, men blir i Grønnevik romjula - bortsett fra vareteljing 30.12 på Kiwi i Sveio!!
Eg vil ynskja alle mine lesarar(om det er nokon, -eller om bloggen berre er eit utløp for personlege behov)ei god jul og eit riktig godt nytt år!

Desember.

2007-12-08T23:23:00.000+01:00

Julemånaden er her med regn, blåst og henting av kristtorn til svigermor. Etter nokre fantastiske dagar i Praha, der vi var siste veka i november og berika oss på korleis ein skule der nytta Smart-board, er det godt å komma heim til vestlandsk fjordaver! Ulikt handelstanden i våre byar, venta tjekkarane til 1.desember med å bygga opp handelshyttene sine på klokketårnplassen i Praha! Det står respekt av slikt! Kledde meg i ull inst og frakk ytst, og i vinden langs elva og over Karlsbrua, var det eit lurt sjakktrekk. Og det har dei greie på, for tjekkarane lagar og sjakkspel(mindre kjent enn krystall i alle former), difor tok eg eit med meg heim til Håvard, som no skal læra opp Synnøve for å skaffa seg lokal motstandar.
Vaska bilen igår. Verka som det var to år sidan sist! Men idag var han her igjen: limousinkjensla! Glitrande blank og svart, nett høveleg til å kjøra Liv Sigrun til Førde, som første etappe på tur til London. Kjekt å reise!! Ikkje mange dagane no, før vi ruslar på Strøget, for å nyta Køben i førjulsprakt, berre oss to! Takk til Astrid for gevinsten, forresten!

Haustferie!! Fortent og etterlengta!

2007-10-07T19:52:00.000+01:00

Etter lange dagar og vel mykje regn, har vi fått seglbåten i naustet og terhien på hengar. Slepp å tenka på ausing av båt, medan turen atter går over fjorden til største samlinga med tjuegods i verda (british museum/tower). Men denne gongen er det markeda i Camden og Notting Hill som freistar, og elles shopping over ein lav sko - eller nokre par nye sko- dersom det høver! Meldt 18-20 grader, og det er heilt fint for tubing, vandring gatelangs, cider på puben og Mama mia!

London er alltid bra!

2007-09-16T21:34:00.000+01:00

Vel tilbake etter kollegietur til London, med 20 grader og sol! Camden town var betre enn eg huska med mykje av alt. Covent Garden er ei turistfelle som lever opp til ryktet på alle måtar! Triveleg i gatene ikring, og skogata openberte seg med nye Dr.Martens til meg! Mykje folk i Oxford S., som vanleg, og tettpakka på Liliwhites, men betre på Niketown- til høgare prisar! Cider av alle slag vart inntatt under besøket, men Medievel banquet var ein pinleg oppleving. Og Royal National Hotel er nok verdas største ungdomsherberge... Kjekt å komme heim med byblomar frå storbyen vår!
Elles er vi stolte og rørte over vesle Laurits som er kommen til verda, og verkar sterk og klar til å ta fatt på livsvegen! Gratulerer masse til foreldre og ulike bester, tanter og onklar!

"Sommar" - liksom??

2007-08-04T18:02:00.000+01:00

Verste sommaren! Kjem høgt opp på lista, i alle fall! Savnar varme, sol og kjekke badetemperaturar i sjøen! Spansken gjekk tilslutt særs bra til meg å vera. Men etterverknadane av intens sjølvsentrert jobbing gav få innspel om sommarlignande tilstander for familien. Lite av naust-livet vi vil ha! M og OE har vore mykje på gamlahuset, og det er kjekt at det er i bruk. Elles har det vore utstrakt byggeverksemd på det nye naustet. Skal bli greit å få det ferdig, slik at normalen kan komma att!

June, at last!

2007-06-02T21:20:00.000+01:00

Så var ein trivelig, kjekk, koseleg og vel gjennomført konfirmasjon over. Glad og nøgd konfirmant, blide og ikkje utslitte foreldre. Kan ting bli betre? Ungdomsbordet verka til å vere ein kjekk plass. godt at dei unge får treft kvarandre! To innleveringar i spansk på plass og berre munnleg att: blir nok betre på tirsdag, men ikveld gjekk det meste i badl... Kjekt å vera ute i ein flott hage, og av og til ta pause med kaffi og triveleg selskap. Og snart er det sommar...

Og så var påska her...

2007-04-03T08:16:00.000+01:00

Flott ver er kjekt å få! Våren er undervurdert, spør du meg! Varmare og lysare for kvar dag, symfonisk fuglesong, knoppane sprett og naturen blømer!
Men då er det tid for stell og vedlikehald av hage og småbruk, båtar, utemøblar og hus. Heile ledige dagar (les: påskeferie) er uvurderlege for å få arbeidd med slikt!

Mekanisk redskap har letta livet for menneske på små gardsbruk. Difor er Husquarna, Stihl og Massey Ferguson kjente og kjære hjelparar her i Grønnevik! Feire hengarlass med greiner, lyng og gyvel er alt plassert i kaldkomposten.

Konfirmasjonsdressen vart forresten innkjøpt igår: Utruleg å sjå guten koma ut av prøverommet stivpynta og vaksen! Søndag var aprilsnarrdagen, så ingen vil vel tru at alle fire fekk dukka seg i sjøen, på så låg fjære at seglbåten stod nedpå inne i naustet!

Letta sjel: Både litteratur- og kulturinnleveringa i spansk(Marti og Barca) er inne som førsteutkast til rett tid og rimeleg langt komne begge!

Post-vinterferie-kveld.

2007-02-26T23:21:00.000+01:00

Ferie som begrep er oppskrytt! Veka blir fylt med nyttige gjeremål som ikkje har noko med ferie å gjere. Bur ein slik og har konfirmasjon til våren, er det mykje vettugt å driva med! Men ferie...?
Likevel er det godt å vakne litt seinare, ha tid til kaffi og lengre frukost. Tid til familie, tid til at familien får klede dei treng, tid til å vere i byen lenge nok til at lista blir tom, tid til å sage ned rotvelter.
Og til studiearbeid!
Følsomme vers av Jose Marti blir neste prosjekt!

Vintaren kom att!

2007-02-07T17:26:00.000+01:00

No ligg tempen på omlag seks kalde nattestider, og nett oppi nullen på dagtid. Nok snø til at landskapet lyser opp og at vegen vert islagt. Sjøen var kald søndag då me bada, 6 grader er kaldast denne vinteren. Men brøyting har eg sluppe denne snø-økta. Me båt i garasjen må bilen måkast og rensast kvar morgon, men med kjekke raske ungar kjem vi oss ut likevel. Konfirmantfesten på Bømlo gjekk stort sett for seg i høvelege former. 280 ungdommar har mykje for seg i løpet av eit halvt døgn, men for oss gamle er det ei trøyst at de unge først vart trøytte! Mange kjekke, trivelege, vanlege ungdommar samla på Langevågtunet!

Blå mandag!

2007-01-29T20:53:00.000+01:00

Der gjekk snøen,heldigvis! Flott så lenge han låg. Ungane koste seg og var mykje i han og glidande oppå han på ski eller racer. Brøytinga som ein draum med nytt batteri og gammal erfaring! Utruleg flink laurdagskvelden når ungane hadde overnattingsbesøk og eg leste spansk!! Kom likevel berre eit stykke i veg og har mykje att: ambisiøse lærarar på høgskulen(Magalis) - er akkurat det!
Kjekt med gladnyhende frå Austlandet!! Kos dokke masse!!
Dagane er lysare no, og turane kan strekkast før mørket kjem sigande. Tru om dei over fjorden ser lysa våre? Kva tenkjer dei då? Noko veit vi, men... Ser lysa hos dei og gler oss over at hyttefeltet stundom huser menneske.
Blå t-skjorte med che på passar på ein mandag. Minne frå Piñar del Rio sin sigarfabrikk. Blå himmel skin opp imellom skyene..

Ein gard utan traktor.....

2007-01-20T23:53:00.000+01:00

Der var masseyen tilbake! Kjørte han heim idag, etter at Jan Kåre hadde forbarma seg over han eit halvt års tid. Avventar ein blodig rekning, men, men! Sikra oss regnskuren idag og,- når eg skulle bere inn tørr ved, som har lagt i eldhuset i snart to år!! Lova sol i morgen så resten av tulipanane kjem kanskje i jorda.

Endeleg fredag!

2007-01-19T22:03:00.000+01:00

Oppskrytt, men likevel fredag! Dei andre ute på litteraturgruppe og bursdagsfeiring. Sjølv les eg Emma Zunz på spansk - vrient med alle metaforane til Borges! Finn ein engelsk maskinoversett tekst som klargjer noko. Kappkjører Carbon med Synnøve og tapar glatt! Skulle ha gjort så mykje....Vekedagane går til alt anna... - og helgene virkar på ein måte kortare ... Bilen var glassert i dag tidleg, håpar masseyen blir ferdig til imorgon, slik at vi kan få skrapt vegen og kjørt inn meir ved. Den kapitulerte i sommar under gruskjøring, når lastebilen kjørte i søre veita rett innfor porten.

Blåsbortsøndag i januar!

2007-01-14T16:14:00.000+01:00

Inatt blåste det slik at vi vakna av knirking i veggane og regn på rutene.Men det gav seg etterkvart og lite var rokka av tre og takstein. Vandra rundt og såg i OPPHALDSVER! Tulipanløkar sett i jorda og eit kjølig kort bad i sjøen gjer meining til ein "vinter"-dag. Fint å få ta seg inn når vekedagane blir korte og hektiske!

2007-01-11T21:52:00.000+01:00

Første gong som bloggar... Rart! Men kjekt å prøve! Mørk vinter, ps2 carbon bak meg og nett komen heim frå spansk litteratur(José Marti) Snøen kunne gjerne lagt om bakken var frosen.... Men no kan han berre forsvinne! Kanskje traktoren snart er ferdig? Då kan eg få brøyta..